Vëllazëria mbi politikën: Si të ruajmë unitetin në kohë zgjedhjesh

Është e natyrshme që të ketë mendime të ndryshme, ide të ndryshme dhe vizione të ndryshme. Por ajo që nuk duhet harruar asnjëherë është se para se të jemi përkrahës partish apo kandidatësh, ne jemi vëllezër në gjak e në fe, fqinjë në lagje dhe pjesëtarë të një shoqërie që ndajmë të njëjtin fat

Nga Mr.Hasan BAFTIJARI

Në këto ditë të fushatës zgjedhore, sheshet, rrjetet sociale dhe bisedat mes njerëzve janë të mbushura me emra kandidatësh, slogane, premtime e debate. Është e natyrshme që të ketë mendime të ndryshme, ide të ndryshme dhe vizione të ndryshme. Por ajo që nuk duhet harruar asnjëherë është se para se të jemi përkrahës partish apo kandidatësh, ne jemi vëllezër në gjak e në fe, fqinjë në lagje dhe pjesëtarë të një shoqërie që ndajmë të njëjtin fat.

BASHKIMI ËSHTË MËSHIRË, PËRÇARJA ËSHTË NDËSHKIM

Profeti ynë, Muhamedi s.a, na ka mësuar një parim të artë kur ka thënë: Bashkimi është mëshirë, ndërsa përçarja është ndëshkim.

Ky mësim nuk kufizohet vetëm në çështjet e besimit, por shtrihet në çdo aspekt të jetës sonë, përfshirë edhe garat politike. Nëse lejojmë që zgjedhjet të na ndajnë, të na kthejnë në armiq dhe të na bëjnë të flasim me gjuhë të ashpër ndaj njëri-tjetrit, atëherë kemi humbur jo vetëm urtësinë e zgjedhjeve, por edhe bekimin e vëllazërisë. Bashkimi nuk do të thotë të mendojmë njësoj, por të qëndrojmë pranë njëri-tjetrit edhe kur nuk pajtohemi.

LE TË JETË GARË IDESH, JO SHARJESH

Fushata zgjedhore nuk duhet të jetë betejë urrejtjeje, por garë shërbimi. Kandidatët duhet të maten me vizion, me punë të kryer dhe me sinqeritet në zemër. Qytetarët duhet të gjykojnë mbi programet e tyre, jo mbi thashethemet e rrjeteve sociale. Kritikojmë programin, por jo nderin e askujt. Debatojmë fort për të vërtetën, por nuk thyejmë lidhjet e gjakut, fqinjësisë apo vëllazërisë. Në vend të gjuhës së ashpër, të përdorim gjuhën e argumentit dhe të respektit, sepse ky është mjeti më i fuqishëm për të fituar zemrat.

PAS ZGJEDHJEVE DUHET BASHKËPUNIM

Kushdo që fiton nesër, do të jetë përfaqësues i të gjithëve – edhe i atyre që nuk e kanë votuar. Ndaj, në vend që t’i presim rrugën njëri-tjetrit për arsye politike, pse të mos i zgjasim dorën dhe t’i themi: “Ti tani je përgjegjës për të mirën e të gjithëve, dhe ne do të të mbështesim në punën e mirë, por do të të kërkojmë llogari nëse devijon”? Bashkëpunimi pas zgjedhjeve tregon maturi politike dhe pjekuri qytetare. Është shenjë se nuk kemi qenë të lidhur me individin, por me të mirën e shoqërisë.

VËLLAZËRIA ËSHTË AMANET

Allahu i Madhëruar thotë: Vërtet besimtarët janë vëllezër. (El-Huxhurat: 10)

Ky ajet duhet të na kujtojë çdo ditë se lidhja e vëllazërisë është shumë më e madhe se çdo bindje politike apo partiake. Ne mund të kemi mendime të ndryshme për mënyrën se si zhvillohet vendi, por duhet të kemi një zemër të përbashkët për paqen dhe dashurinë mes nesh. Të ruajmë lidhjet e zemrës është detyrë para Allahut dhe themel i suksesit të çdo shoqërie.

FITUESI I VËRTETË

Fituesi i vërtetë nuk është ai që del i pari në kutinë e votimit, por ai që fiton zemrat e njerëzve me shërbim të sinqertë. Shoqëria e fituar nuk është ajo që ka një kryetar të ri, por ajo që ka ruajtur unitetin e saj dhe është ngritur mbi dashuri e mirëkuptim. Politika vjen e shkon, por marrëdhëniet njerëzore janë thesari më i madh që kemi. Mos e thyeni miqësinë për një votë, sepse zgjedhjet zgjasin disa javë, por plagët e ndarjes mund të zgjasin vite. Në fund të fundit, historia do të kujtojë jo vetëm kush fitoi, por edhe si u sollëm me njëri-tjetrin.